Guzmán Carreiras, Jesús

Labrego, 51 anos. Casado. Veciños de Muras.

Dirixente do PSOE en Muras, onde foi un dos fundadores en 1933 da Agrupación Socialista (AS), da que o elixiron vicepresidente. Militante da UXT.

Encarcerado.

Despois de que se producira o golpe rebelde detivérono o día 19/08/1936.

Ingresado no depósito de Viveiro (Lugo) o día 09/11/1936 e trasladado á Prisión Provincial de Lugo.

Xulgado en consello de guerra en Lugo o día 16/01/1937 polo delito de rebelión militar, na causa 801/36, co resultado de sentenza a cadea perpetua segundo resolución do día 21/01/1937. Neste proceso xulgaron a varios veciños de Láncara, Muras, Ourol e Viveiro, todos na provincia de Lugo.

A correspondente sentenza ditou pena de morte para: Jesús Bellas Cao (xulgado en varias causas), José Felpeto Gómez (conmutada pola de cadea perpetua) e Antonio Lafuente Jiménez. A cadea perpetua castigaron a: Antonio Baamonde Carreiras, Luis-Enrique Baamonde Peón, Antonio-María Carreiras Pita, Jesús Fernández Fernández, Jesús Guzmán Carreiras, José-María Pérez Rego, José Prado Palo e Francisco Vidal Baamonde. Cadea de 12 anos e un día para: Francisco Cora García e Alejandro Temblás Paz. Tamén condenaron a prisión a Modesto Riguera Díaz. O auto declarou fuxido a José Temblás Paz.

Tamén o procesaron no Tribunal Militar Territorial de Lugo por rebelión e auxilio a rebelión na causa 906/36 e na causa 907/36.

Trasladárono á Prisión Provincial da Coruña o día 20/03/1937. Interno nesta cadea, publicaron a súa liberdade condicional provisoria no BOE nº 85 do día 25/03/1944.

Procesárono no Tribunal Rexional de Responsabilidades Políticas da Coruña e indultárono no ano 1940 e no ano 1961.