Hernández Ares, Bernardo

Empregado e sindicalista, 29 anos. Solteiro. Veciño da rúa do Orzán, 64-1º, na Coruña.

Presidente do Sindicato de Traballadores do Comercio na Coruña, da UXT.

Pertenceu á loxa masónica Renacemento Masónico nº 18.

O día 5 de abril de 1936 foi un dos oradores do mitin sindicalista da UXT na Coruña, que convocou o Sindicato de Traballadores do Comercio e no que tamén participou Matías Usero Rey-Torrente, ao que asasinarían tamén os franquistas o día 21/08/1936. Segundo algunhas fontes o mitin do Teatro Rosalía rematou con certa polémica por derivar cara cuestións masónicas a intervención de Usero.

Paseado.

Participou na resistencia contra os sediciosos na cidade herculina e despois do triunfo dos alzados agochouse na casa dun amigo en Oleiros (A Coruña); os fascistas deron con el.

Morte rexistrada a causa dunha hemorraxia interna (eufemismo para indicar que morrera dun tiro no estómago). O seu cadáver apareceu nunha cuneta preto da praia de Bastiagueiro cun tiro na cabeza.

Soterrárono o día 18 de agosto nunha fosa común no cemiterio de San Amaro, na Coruña, con José Aradas Pousa, Rogelio Ares Valiño, Luis Baldomir Trillo, José Boedo López, Manuel Hermida Hermida, Severino López López, José Pérez Ferreño e Antonio Prenas Illobre.

Os militares rebeldes saquearon a súa casa.

Xulgárono no Tribunal Especial para a Represión da Masonería e o Comunismo no ano 1940.