Valcárcel Montenegro, Salvador

Labrego, 25 anos. Veciño de Taboada (Lugo).

Fuxido. Morte en enfrontamento.

Foxe ao monte ao principio do golpe militar e liderou un grupo guerrilleiro no suroeste da provincia de Lugo, principalmente no concello de Chantada. Neste grupo figuraban tamén: Benjamín Argiz Fiunte; Jesús López Suárez, Gazapo; Benito Montes Otero e Victorino Quintana Vázquez.

Xulgado en consello de guerra en Lugo polo delito de atraco, na causa 765/38, co resultado de ser declarado fuxido e en rebeldía segundo resolución do día 22/12/1938.

Mantivo contactos co grupo de Rodeiro (Pontevedra) que formaban Benjamín García Diéguez, o Largo, e Ramón Sánchez, Areán.

Xulgado en consello de guerra en Lugo polo delito de atraco, na causa 812/38, co resultado de ser declarado fuxido e en rebeldía segundo resolución do día 22/12/1938.

Neste proceso condenaron a 16 anos de cadea a José Benito Rodríguez; a 12 anos e un día a: Emilia Cadahía Montes, Manuel González García, Evaristo López Caseiro e Claudina Rodríguez Fernández; declararon fuxidos a: Ricardo Areán Sánchez, Benjamín Argiz Fiunte, Salvador Gil Moure, Jesús López Suárez e Victorino Quintana Vázquez; ditaron sentenza de absolución para Francisco Blanco Caseiro. Tamén procesaron, entre outras persoas, a: Manuel Gil Moure, Estrella Lamas González, Claudio Rodríguez Castro, Hilda Rodríguez Fernández, Salvador Valcárcel Montenegro e Manuel Vázquez López.

O día 11/04/1939 o seu grupo asaltou un ómnibus da empresa Montaña, que facía o percorrido Lugo-Ourense, e no que viaxaba un sarxento do Exército que se enfrontou aos guerrilleiros.

Os asaltantes lograron fuxir e o sarxento deu aviso a Lugo, de onde saíron forzas do Exército e da Garda Civil. Localizaron aos guerrilleiros antifranquistas en Adá, onde houbo un enfrontamento no que morreron Salvador e outros dous guerrilleiros por mor de disparos.

Xulgado no Tribunal Militar Territorial de Lugo por atraco e roubo a man armada, na causa 23/39, co resultado de sentenza de sobresemento definitivo segundo resolución do día 17/06/1939.

Xulgado en consello de guerra en Lugo polo delito de rebelión militar, auxilio á rebelión e atraco, na causa 930/39, co resultado de sobresemento definitivo por falecemento anterior. Acumulada á causa 812/38.

Neste xuízo o tribunal condenou á pena de 15 anos a José Costa Clavell; penas de 12 anos e un día para: María Montes Caseiro e Manuel Silva Calviño; autos de sobresemento para: Eladia Diéguez N. e Salvador Valcárcel Montenegro (este por falecemento anterior). Tamén procesaron a: Benjamín Argiz Fiunte, Emilia Cadahía Montes, Darío Calvo Paz, Salvador Gil Moure, Victorino Quintana Vázquez, Claudina Rodríguez Fernández, Hilda Rodríguez Fernández e José-Benito Rodríguez López.