Castro Rodríguez, Manuel

Tiña 30 anos.

Militante do PCE.

Exiliado. Executado.

Comisario político do V Corpo de Exército do Exército do Centro, V Rexemento de Aceiro, do Exército Popular da República. Estivo á fronte da 19ª Brigada Mixta en Madrid e da 48ª Brigada Mixta tamén en Madrid. Acadou o grao de tenente coronel e mereceu a Medalla ao Valor do exército republicano en outubro de 1938.

Rematada a guerra civil exiliouse en Francia e participou na resistencia contra dos alemáns, dirixiu o Batallón de Tarbes a a 26ª Agrupación Guerrilleira do maquis e acadou o grao de tenente xeneral ao participar na liberación.

En outubro de 1944 o PCE enviouno a Galicia para organizar os grupos guerrilleiros, despois de participar na fracasada invasión do Val de Arán.

Manuel Castro Rodríguez, o Galego, presidiu en outubro de 1944 a Reunión de Presedo, Abegondo (A Coruña), á que acudiron: Manuel Ponte Pedreira, Xastre, Negro, Pintor; José Remuiñán Barreiro, Ricardito; Francisco Rey Balbís, Moncho; José-María Urquiola Iglesias, Chema, Pepe, Tino; Adolfo-Cipriano Allegue Allegue, Riqueche; Juan Pérez Dopico, Xan de Xenaro, e outros responsables guerrilleiros. Nesta reunión comentáronlles as consignas da Unión Nacional Española (UNE) e acordouse tamén a constitución do Exército Guerrilleiro de Galicia (EGG).

Logo marchou de Galicia para Madrid ao non acadar o apoio de todos os grupos guerrilleiros, que lle deron o mando a Marcelino Rodríguez Fernández, Marrofer.

O día 20/10/1945 prendérono en Madrid con algúns dos seus homes e o 21/02/1946 fusilárono en Alcalá de Henares con nove antifranquistas máis, entre eles Cristino García Granda (Gozón, Principado de Asturias).