Orozco Muñoz, Carmen

Mestra, 20 anos. Casou pouco antes do remate da guerra civil con Fernando Huerta. Veciños de Valencia. Estudou Maxisterio na Escola Normal de Valencia.

Militante do PCE de Valencia desde 1937 e da Federación de Traballadores da Ensinanza da UXT (FETE-UXT).

Encarcerada.

Co seu home e outras persoas tentaron reorganizar o PCE valenciano na clandestinidade. Despois de duros interrogatorios o seu home tentou suicidarse e asasinárono a tiros.

Procesárona no ano 1939 no Tribunal Militar Territorial de Valencia.

Nese ano 1939 ingresou na cadea en Valencia e daba a luz; puxérona en liberdade o,12/07/1940 e fuxiu cara Madrid, onde se relacionou coa organización do PCE. Alí contactou e colaborou con José Bartrina Villanueva, facendo tiraxes clandestinas de Mundo Obrero e El Guerrillero, e co que se trasladou á Coruña en setembro de 1947 por orde do partido; semella que estaban unidos sentimentalmente.

No Bar Barlovento da Coruña, o día 10/10/1948, arrestaron a: Antonio Seoane Sánchez, Julián, Jorge; Josefa González Cudeiro; José Rodríguez Campos e os axentes de enlace José Ramos Díaz e Juan Martínez Montero. A operación policial dirixiuna Eduardo Alfonso Cruz, xefe do Servizo de Información da 140 Comandancia da Garda Civil na Coruña, empregando datos obtidos polo axente infiltrado na guerrilla Alejo-Pablo Mora García. A Bartrina e a Carmen Orozco tamén os prenderon.

Ao secretario xeral do PCE José Gómez Gayoso, Juan, Carlos, López, e á súa compañeira María Blázquez del Pozo, detivéronos ao día seguinte.

Xulgada o día 18/10/1948 en consello de guerra sumarísimo na Coruña, na causa 370/48, presidido polo tenente coronel de Enxeñeiros, xefe do Batallón de Transmisións do VIII Corpo de Exército de Estremadura, Ramón Rivas Martínez.

As sentenzas foron as seguintes penas de morte para: José Gómez Gayoso, Antonio Seoane Sánchez, e José Bartrina Vilanueva (conmutada pola de cadea perpetua); Juan-José Romero Ramos, cadea perpetua; María Blázquez del Pozo, 30 anos de cadea; Josefa González Cudeiro, 25 anos de cadea; tamén condenaron a penas de prisión a: Clementina Gallego Abeledo, Carmen Orozco Muñoz, José Rodríguez Campos. Ademais procesaron a outros enlaces.

O xuízo converteuse nunha farsa, sen probas nin testemuñas. A José Bartrina, ao que tamén condenaran á pena de morte, conmutáronlla pola de cadea perpetua e morrería na prisión de Alcalá de Henares (Madrid) o día 21/11/1956 por mor de falta de coidados médicos.

Carmen Orozco, condenada a 30 anos, pasou polas cadeas da Coruña, Segovia (decembro de 1948), Valencia, outra vez Segovia e Alcalá de Henares (Madrid).

O día 06/11/1948 executaron a Gayoso e a Seoane.

A Carmen puxérona en liberdade condicional o día 09/10/1960 e en liberdade definitiva o 09/10/1965.

Fixou a residencia en Valencia.