Romero Ramos, Juan-José

Carpinteiro, 28 anos. Solteiro. Veciño de Rilo.

Membro da Organización Republicana Galega Autónoma (ORGA) en Mugardos.

Encarcerado.

Cando se produce o alzamento sedicioso, con varios veciños, participou no asalto ao Pazo de Piñeiro o día 21/07/1936 na procura de armas; no tiroteo cos moradores morreu un dos donos e un crego. Prendérono os franquistas.

Xulgado no ano 1936 en consello de guerra en Ferrol (A Coruña) polo delito de rebelión militar, na causa 379/37, co resultado de sentenza á pena de morte.

Pena de morte conmutada na comisión de exame de penas da Coruña pola de cadea perpetua.

Interno na Prisión Provincial de Oviedo (Principado de Asturias), publicaron a súa liberdade condicional provisoria no BOE nº 85 do día 25/03/1944.

Saíu da cadea e comezou a traballar na industria Pequerías y Saladeros de Bacalao de España (PYSBE) en Ferrol.

No ano 1946 establécese como vendedor ao por maior de chatarra facendo frecuentes viaxes entre Galicia e a fronteira con Francia.

Compañeiro no PG de Manuel Gómez Varela, Fera Brava, Manolo do Penso, que o puxo en contacto coa guerrilla antifranquista.

Foi enlace da resistencia antifranquista e incorporouse á guerrilla no ano 1947, no Destacamento Arturo Cortizas, da IV Agrupación do Exército Guerrilleiro de Galicia (EGG), que comandaba Adolfo-Cipriano Allegue Allegue, Riqueche. Transportaba propaganda e armas ao acubillo da compra-venda. Acompañábao en ocasións nesta labor Clementina Gallego Abeledo.

En outubro/decembro de 1947 introduce na guerrilla ao axente infiltrado Alejo-Pablo Mora García.

Xulgado no Tribunal Militar Territorial da Coruña na causa 40/48 por rebeldía.

Detido en xullo de 1948 en Irurtzun (Navarra) con Clementina Gallego Abeledo, cando conducía un camión de chatarra no que ían agochadas armas con destino a Galicia; dous subfusís, oito metralladoras, dúas pistolas e 2000 cartuchos.

Xulgado o día 18/10/1948 en consello de guerra sumarísimo na Coruña, na causa 370/48, presidido polo tenente coronel de Enxeñeiros, xefe do Batallón de Transmisións do VIII Corpo de Exército de Estremadura Ramón Rivas Martínez e co resultado de sentenza a cadea perpetua

As sentenzas foron as de pena de morte para: José Gómez Gayoso, Antonio Seoane Sánchez, e José Bartrina Villanueva (conmutada pola de cadea perpetua); Juan-José Romero Ramos, cadea perpetua; María Blázquez del Pozo, 30 anos de cadea; Josefa González Cudeiro, 25 anos de cadea; tamén condenaron a penas de prisión a Clementina Gallego Abeledo, Carmen Orozco Muñoz, José Rodríguez Campos. Tamén procesaron outros enlaces.

Saíu da cadea no ano 1966.