Río Pampín, José del

Barbeiro, 22 anos. Veciño de Ordes. Irmán de Manuel del Río Pampín, tamén fusilado o mesmo día.

Militante do Partido Galeguista (PG) desde a súa constitución en Ordes no ano 1935 e foi delegado do Comité Local da Fronte Popular (FP).

Executado.

José sería unha das persoas que dirixiu os traballos de resistencia aos golpistas organizando a requisa e o reparto de armas, as patrullas de vixilancia, cavando trincheiras e acudiu a Santiago de Compostela e á Coruña na defensa da legalidade republicana.

O día 22 de xullo ingresárono os franquistas na cadea en Ordes e logo enviárono a Santiago de Compostela.

Xulgado o día 22/12/1936 en consello de guerra en Santiago de Compostela polos delitos de traizón e de rebelión militar, na causa 230/36, co resultado de sentenza á pena de morte.

Condenaron á pena de morte neste xuízo a: Ángel-Jesús Caamaño Villaverde, José García Fernández, José de la Iglesia Vilariño, Manuel Moure Rey, Andrés Nogareda, Paulino Pérez García, José Pérez Sanmartín, José del Río Pampín, Manuel del Río Pampín, José Vázquez Mandayo e Benito Vilariño Liste; castigaron a cadea perpetua a Salvador Grela Veiras e a 12 anos e un día a Manuel del Río Botana.

Fusilárono os golpistas no cemiterio de Boisaca.

O día 08/02/1937 fusilaron no cemiterio de Boisaca a 11 veciños de Ordes, sentenciados á pena de morte nesta xuízo: Ángel-Jesús Caamaño Villaverde, mestre; José García Fernández, mestre; José de la Iglesia Vilariño, labrego; Manuel Moure Rey, labrego; Andrés Nogareda, xornaleiro; Paulino Pérez García, mecanógrafo; José Pérez Sanmartín, latoeiro; os irmáns José del Río Pampín, barbeiro, e Manuel del Río Pampín, carteiro; José Vázquez Mandayo, xornaleiro, e Benito Vilariño Liste, xornaleiro.

Xulgado en consello de guerra en Santiago de Compostela (A Coruña), na causa 160/45.

O tribunal militar condenou á pena de cadea perpetua a: Jesús Calvo Martínez, Germán Doval García, Tomás Iglesias N. e Juan Ríos García. Tamén procesaron a: Francisco Comesaña Rendo, José García Fernández, Salvador Grela Veiras, Manuel Moure Rey, Andrés Nogareda, Paulino Pérez García, José Pérez Sanmartín, Manuel Ponte Pedreira, Manuel del Río Botana, Pedro del Río Caramelo, José del Río Pampín, Manuel del Río Pampín, José Vázquez Mandayo e Benito Vilariño Liste; a moitos deles executáranos con anterioridade.