Díaz Milia, Claudio

Policía. Veciño de Madrid. Casou en agosto de 1944 con María-Luz-Divina Iglesias Blanco.

Infiltrado.

Infiltrado na guerrilla entre o 16 e o 19 de maio de 1946, incorporándose á IV Agrupación do Exército Guerrilleiro de Galicia (EGG) con José Dasilva Bartomeu, Moreno, despois de contactar con Manuel-Luis Bello Parga e integrárono no Destacamento Santiago Álvarez da IV Agrupación do EGG.

Participou no atentado guerrilleiro a unha estación de Radio Nacional de España (RNE) na Coruña.

Tamén tomou parte con Pedro Rodríguez Gómez; José Remuiñán Barreiro, Ricardito, Simeón; José Blanco Núñez, Ferreirín, Pepito; José Santiago Temprano, Henares, Hornaca, e Antonio Nouche Costa, Dourado Xaneiro, o Soldado de Deixebre, na reclamación dunha sanción económica de 30.000 pesetas ao alcalde franquista de Cerceda (A Coruña).

O día 26/06/1946 delatou aos guerrilleiros aos que atacou a Garda Civil na Chousa do Urzal, Cestaños, Santa Mariña de Parada, Ordes (A Coruña). No enfrontamento morreu Antonio Recouso Boquete e feriron a José Blanco Núñez, José Santiago Temprano e Enrique Ferreirós Candamo. Pedro Rodríguez Gómez resultou ileso.

Desertou da guerrilla o día 28/07/1946 cando a súa partida, do grupo de Manuel Ponte Pedreira, se acubillaba nunha adega preto de Ordes. Claudio avisou á Garda Civil de Ordes e houbo un enfrontamento que se saldou coa retirada das dúas partes contendentes. Como consecuencia da traizón de Claudio arrestaron unhas 300 persoas o que deixou á guerrilla sen apoios. A súa información tamén permitiu a detención en Carballo (A Coruña), o día 18/08/1948, de Amador Domínguez Pan, Jaime Pimentel.