Sánchez Mártil, Víctor

Mestre e político, 38 anos. Casou coa salmantina Justa Muñoz Martín; tiñan cinco fillos. Veciños do Forte, en Cangas (Pontevedra). Estudou Maxisterio na Escola Normal de Salamanca. Mestre nacional en Béjar e Salamanca, en 1927 destinárono a Quinta do Monte, San Pedro de Roca, Esgos (Ourense) e, en 1930, á Escola do Pósito de San Salvador de Coiro, Cangas (Pontevedra).

Formou parte do Círculo Republicano de Cangas e participou na constitución da Asociación de Traballadores da Ensinanza de Vigo (Pontevedra) en 1931, da que sería vogal. Participou no congreso da Federación de Traballadores da Ensinanza, da UXT (FETE-UXT) do día 19/03/1936. Tesoureiro da Federación de Pósitos do Morrazo e administrador do de Coiro.

Comunista, prendérono en dúas ocasións por mor da folga xeral revolucionaria de outubro de 1934; acusárono de ter a intención de atentar contra o pósito no que tan animosamente traballaba. Retivérono tres días en Vigo e deixárono en liberdade sen cargos.

Vogal da Fronte Popular (FP) na súa vila de residencia.

Executado.

Co golpe dos rebeldes detivérono os fascistas o día 25 de xullo, ingresárono na prisión de Cangas e trasladárono á Prisión Provincial de Pontevedra o día 12/09/1936.

Xulgado en consello de guerra sumarísimo en Pontevedra o día 19/09/1936 polo delito de rebelión militar, na causa 790/36, co resultado de sentenza á pena de morte.

O tribunal militar condenou á pena de morte a: Lorenzo-Santiago-Victoriano Corbacho Rodal, Agustín Jorge Etcheverri, Antonio Fernández Fernández, José Meis Martínez, José-Manuel Millán Costas, Víctor Sánchez Mártil e Antonio Varela Vázquez; castigaron coa cadea perpetua a: José-Miguel Carracelas Álvarez, Germán Chapela Leiro, Francisco Cordeiro Refojo, Gumersindo Gastiasoro Ruiz de Azúa, Serafín Gómez González, Joaquín-José Nores Rodríguez e José-Modesto Rodal Lanzós; penas de 20 anos de cadea para Ismael Costas Caamaño; sentenzas de 12 anos e un día para: Manuel Díaz Carballo, Manuel González Dantas, Manuel Sotelo Alonso, Juan Valladares Taboada e Valentín Villar Soliño; pena de seis anos e un día para Evaristo Dobarro Landín; tamén sentenciaron á cadea a Eduardo García Santos; ditaron auto de absolución para: Eugenio Bermúdez Piñeiro, Ramón Costas Otero, Rafael Rodal Lanzós e Manuel Sotelo Suárez; sobresemento para: Indalecio Cruz Ramos; declararon fuxido a José Moreira Espiño. Tamén enxuizaron a: Aniceto Franco Durán, Estanislao Mallo Martínez, Jesús-Daniel Millán Costas, Rufino Miranda Cabral, Ángel-Emilio Nores Rodríguez, Manuel Piñeiro Pastoriza, Ángel Rial Vidal, Camilo Rodal Rodal, Secundino Ruibal Villar, Vicente Sáez Ruiz, Luis Soliño Acuña e Adonis-Jesús Teixeira Alonso.

Fusilárono os golpistas na estrada de Campañó, en Pontevedra.