Diéguez Yáñez, Augusto

Cesteiro, 15 anos. Solteiro. Veciño de Santo Antonio de Vilanuíde.

Militante do PCE.

Encarcerado. Fuxido. Morte en enfrontamento.

Os rebeldes ingresárono na prisión de Monforte de Lemos (Lugo) o día 16/10/1937 e trasladárono á Prisión Provincial de Lugo o 08/12/1937.

Xulgado en consello de guerra en Lugo polo delito de auxilio á rebelión, na causa 1341/37, co resultado de sentenza a seis anos e un día de prisión maior segundo resolución do día 21/12/1937.

Pena ordinaria conmutada pola comisión de exame de penas de Lugo; concédeselle a prisión atenuada o día 01/12/1940 e en liberdade desde o 10/10/1940.

Ingresou na guerrilla antifranquista e figurou no grupo de Mario Rodríguez Losada, Pinche, e, tempo andado, no de Silverio Yebra Granja, o Atravesado, na II Agrupación da Federación de Guerrillas de León-Galicia (FG).

Na primavera de 1949 e despois dos desastres guerrilleiros en San Xoán de Chavaga, Monforte de Lemos (Lugo) e de Villasinde, Vega de Valcarce (León) regresaron á comarca do Bierzo (León) os membros da II Agrupación: Silverio Yebra Granja, o Atravesado; Pedro Juan Méndez, Jalisco; Augusto Diéguez Yáñez, Rubio; Silvestre García López, Chimenea; Roberto López Rodríguez, Virnes; Francisco Martínez López, Quico, Odilo Fernández Rodríguez, Blas, e Manuel Zapico Terente, Asturiano, Lito.

En xullo de 1950 reclamouno o xuíz militar de Lugo, con outros fuxidos, encartados na causa 144/50.

Tempo andado pasaron á Serra da Cabreira (León e Zamora), incorporándose á partida de Manuel Girón Bazán, Girón. Grupo que deixou en 1950 con Silvestre García López e trasladáronse á zona fronteiriza entre Ourense e Lugo.

Morreu nun enfrontamento coa Garda Civil nunha casa en Fontei, cando ían camiño do Bierzo, xunto co seu compañeiro Silvestre García López e como consecuencia da traizón dunha enlace, a dona da casa. Viaxaban coa intención de xuntarse cos últimos compañeiros de Girón para acadar Francia.