Fernández Garea, Ángel

Garda civil. Veciño da Coruña. No ano 1921 era sarxento de exército en Marrocos. En decembro de 1935 era cabo da Benemérita con destino na Coruña

Represor.

O tenente da Garda Civil Ángel Ramos Patiño, xefe da liña da Coruña, dirixiu o operativo para a captura das persoas de esquerdas, que o día 03/03/1937 tentaban escapar na coñecida como Fuga do Portiño, que organizara El Despertar Marítimo; detiveron a 27 persoas.

Neste acción tamén se viron implicados nos operativos de mando o sarxento do mesmo corpo Manuel Santos Otero, comandante de posto, e o cabo Ángel Fernández Garea. Participaron tamén militares da Batería do Monte San Pedro, que mandaba o capitán Carlos Parallé de Vicente.

Para tan sinistro cometido de represión, a Brigada de Servizos Especiais da Garda Civil contou coas significadas colaboracións do xa sarxento Ángel Fernández Garea e os números da Garda Civil: Vicente Peralta López, Pedro Pellicer Nicolás, Juan García Oviedo, Luis Expósito Castaño, José Seijo Carneiro e Bárbaro Ortega Rodríguez. Todos eles se adicaron á represión e á liquidación de anarquistas, entre outras tristes funcións.

En maio de 1937 ascendérono a sarxento de Cabalería da Garda Civil e en setembro de 1940 era brigada na Comandancia da Coruña.

O día 01/07/1937 a brigada de Manuel Santos Otero prendeu na rúa Santander, 17 baixo, na Coruña: Juan López Gutiérrez, Margarita Carrión Castilla, Lino Carrión Castilla, Secundino Rodríguez Eiras e Luis Costa García. No operativo participaron Santos Otero, Ángel Fernández Garea, Vicente Peralta López, Luis Expósito Castaño, José Seijo Carneiro, Juan García Oviedo e Tomás Rodríguez Luengo. Acusábanos dun intento de fuxida en barco e aos arrestados torturáronos para que indicaran o nome do barco que os ía sacar da Coruña e o dos demais implicados.

Santos Otero tamén emitiu o informe da “Caída das Atochas”, cando era xefe dos Servizos Especiais da Benemérita; operación que dirixiu o sarxento Ángel Fernández Garea na casa da rúa Atocha Alta, 55, na Coruña e na que finaron catro membros da FAI. Ángel Fernández recibira unha delación desta reunión clandestina da man do garda municipal Manuel Uzal Montero.

Ángel Fernández xubilouse co grao de capitán.