Peralta López, Vicente

Garda civil. Veciño da Coruña. Número da Garda Civil con destino na Coruña.

Represor.

Ao brigada Manuel Santos Otero encargárono da vixilancia e depuración da cidade da Coruña e de case que toda a provincia. Para tan sinistro cometido, na Brigada de Servizos Especiais da Garda Civil, contou coas significadas colaboracións do xa sarxento Ángel Fernández Garea e os números da Garda Civil Vicente Peralta López, Pedro Pellicer Nicolás, Juan García Oviedo, Luis Expósito Castaño, José Seijo Carneiro e Bárbaro Ortega Rodríguez. Todos eles se adicaron á represión e á liquidación de anarquistas, entre outras tristes funcións.

O día 01/07/1937 a brigada de Manuel Santos Otero prendeu na rúa Santander, 17 baixo, na Coruña, a: Juan López Gutiérrez, Margarita Carrión Castilla, Lino Carrión Castilla, Secundino Rodríguez Eiras e Luis Costa García. No operativo participaron Santos Otero, Ángel Fernández Garea, Vicente Peralta López, Luis Expósito Castaño, José Seijo Carneiro, Juan García Oviedo e Tomás Rodríguez Luengo. Acusábanos dun intento de fuxida en barco e aos arrestados torturáronos para que indicaran o nome do barco que os ía sacar da Coruña e o dos demais implicados.

Entre as accións de Peralta sinalar a cometida ás 02:00 h do día 16/07/1937, cando co garda civil Pedro Pellicer Nicolás, aplicaron a Lei de Fugas, no Matadoiro, a Alejandro-Basilio Palacios. O informe policial, coma sempre, indicaba que o preso tentara fuxir cando era trasladado desde o cuartel da Garda Civil, onde o interrogaran, á Prisión Provincial da Coruña.