Maza Cardama, Manuel

Xornaleiro e político, 43 anos. Casou con Francisca Otero Rozas; tiveron catro fillas e dous fillos: Josefina, Manuel, Dolores, Olga, Jorge e América. Veciños de Lamas de Abade, Nosa Señora de Fátima do Castiñeiriño, Santiago de Compostela.

Concelleiro de Santiago de Compostela nas eleccións municipais de 1936 polo Partido Republicano Federal (PRF); desenvolvía este cargo cando se produce o golpe de Estado.

Tiña como compañeiros na Corporación de Santiago de Compostela de 1936, entre outras persoas, a: Jesús San Luis Romero, encarcerado; Juan Brañas Cancelo, sancionado; José Toba Fernández, sancionado; Juan López Durá, exiliado; Ángel Casal Gosende (alcalde), asasinado; José Germán Fernández, asasinado; Sebastián González García, exiliado; Andrés Suárez Rodríguez, encarcerado; Manuel Martínez García, asasinado; Domingo Rozas Liste, sancionado.

Encarcerado. Exiliado.

Detido despois do golpe militar e ingresado na prisión de Santiago de Compostela.

Xulgado en consello de guerra en Santiago de Compostela polo delito de incitación á rebelión, na causa 402/36, co resultado de sentenza a seis anos de prisión menor.

Cumpriu a pena na Prisión de Partido de Santiago de Compostela.

Pena ordinaria conmutada pola comisión de exame de penas da Coruña e deixárono en liberdade condicional no ano 1940.

Incurso no expediente nº 289/41 diante do Tribunal Rexional de Responsabilidades Políticas da Coruña; sancionárono cunha multa de 300 pesetas.

En 1953 vendeu o seu patrimonio e marchou para Uruguai.