Serantes Liz, Tomás

Empregado e político, 36 anos. Veciño de Ferrol. Traballou na Sociedad Española de Construcción Naval (SECN).

Militante da UXT desde 1913 e da Agrupación Socialista (AS) de Ferrol desde 1924. Presidente da Federación de Sociedades Obreiras en Ferrol. Concelleiro de Ferrol en 1931, 1932 e 1935 polo PSOE.

Pola súa participación na folga xeral revolucionaria de outubro de 1934 estivo na cadea algo menos de dous meses, do 6 de outubro ao 2 de decembro.

Tomás sería concelleiro nas corporacións do alcalde Jaime Quintanilla Martínez de 1931 a 1934, tivo entre outros compañeiros a: Edmundo Lorenzo Santiago, exiliado; Federico Pérez Lago, encarcerado; Manuel Morgado González del Valle, executado; Antonio Santamaría López, exiliado; Fermín-Andrés Mejuto Fernández, procesado; Hipólito Martínez Vez, procesado; Ventura Dios Lojo, encarcerado; Francisco del Río Barros, encarcerado; Adolfo Rodríguez Sánchez, encarcerado; Luciano Cereijo Rodríguez, procesado.

Xa non era concelleiro cando se produce o golpe militar.

Exiliado. Encarcerado.

Despois do golpe rebelde escondeuse ata que puido pasar ao Principado de Asturias, afiliouse á AS de Xixón e incorporándose en maio de 1937 ao exército republicano.

Ao remate da guerra civil pasou a Francia por Irún o día 25/04/1939 e ingresárono nos campos de concentración de Saint-Cyprien (Pireneos Orientais, Occitania, Francia), Le Barcarès (Pireneos Orientais, Occitania, Francia) e Argelès-sur-Mer (Pireneos Orientais, Occitania, Francia).

O día 15/06/1940 embarcou no Cuba rumbo á República Dominicana, país no que os deixaron desembarcar, continuaron ata á illa Martinica e de alí navegaron a México, onde chegou, no vapor francés Santo Domingo, o día 26/07/1940 a Veracruz.