Morgado González del Valle, Manuel

Médico, editor e político, 43 anos. Casado. Veciños da rúa Espartero, 10-1º, en Ferrol. Encadernador da Sociedad Española de Construcción Naval (SECN).

Membro do comité de folga dos estaleiros en 1920.

Participou na fundación e administrou a revista Céltiga no ano 1922. Director do xornal socialista El Obrero en Ferrol.

Militante da Agrupación Socialista (AS) de Ferrol. Concelleiro de Ferrol nas municipais do 12/04/1931 polo PSOE, nomeárono 6º tenente de alcalde. Candidato a deputado do PSOE pola Coruña nas xerais de 1933 sen obter acta.

Detido e cesado como concelleiro pola súa participación na folga xeral revolucionaria de outubro de 1934 e condenado en concello de guerra a 15 anos de reclusión, na causa 310/34; o consello realizouse o día 12/02/1936 no Castelo de San Felipe, catro días antes das eleccións xerais. Neste proceso tamén condenaron a 20 anos a Antonio Santamaría López.

Despois do triunfo da Fronte Popular (FP), en febreiro de 1936, repuxérono no seu cargo de concelleiro ata o golpe de Estado.

Manuel, nas corporacións do alcalde Jaime Quintanilla Martínez, de 1931 a 1934, tivo entre outros compañeiros a: Edmundo Lorenzo Santiago, exiliado; Federico Pérez Lago, encarcerado; Antonio Santamaría López, exiliado; Fermín-Andrés Mejuto Fernández, procesado; Tomás Serantes Liz, exiliado; Hipólito Martínez Vez, procesado; Ventura Dios Lojo, encarcerado; Francisco del Río Barros, encarcerado; Adolfo Rodríguez Sánchez, encarcerado; Luciano Cereijo Rodríguez, procesado.

Con todos eles coincidiu xa como 2º tenente de alcalde na corporación de 1936, agás con Edmundo Lorenzo, Tomás Serantes e Luciano Cereijo. Si estaba entón José López Bouza, de Esquerda Republicana (ER); a alcaldía correspondía por entón a Antonio Santamaría López, cando se produce o golpe militar.

Executado.

Detido polos fascistas en Ferrol o día 21/07/1936.

Xulgado en consello de guerra no Cuartel de Zapadores, en Ferrol, polo delito de traizón o día 11/08/1936, na causa 182/36, co resultado de sentenza á pena de morte.

Neste consello militar condenaron á pena de morte a: Fernando Carballo Rodríguez, Manuel Morgado González del Valle, Juan Rincón Téllez e Antonio Santamaría López; castigaron a cadea perpetua a: Ventura Dios Lojo, José López Bouza, Miguel Mendiguchía Real, Federico Pérez Lago, Adolfo Rodríguez Sánchez e Francisco del Río Barros.

No proceso exerceu de fiscal o auditor Hernán Martín-Barbadillo Pául, que pide a pena de morte para todos os procesados.

Fusilárono os golpistas na mesma cidade de Ferrol, no Cuartel de Artillería, con Fernando Carballo Rodríguez.