Doval Lemat, Manuel

Xastre e político, 36 anos. Casou con Celia Pernas Ramos; tiveron tres fillos e dúas fillas: Manuel, Celia, José-Luis, María del Carmen e Francisco. Veciños de Eimil, San Salvador de Cecebre, Cambre. Nomeárono axente executivo para a recadación de arbitrios municipais na ditadura de Miguel Primo de Rivera Orbaneja. Tiñan unha taberna e estanco e desenvolvíase como xuíz municipal en Cambre.

Na II República presidiu a Confederación Española de Dereitas Autónomas (CEDA) en Cambre, que se constituíra en abril de 1935.

Represor. Axustizado.

Despois do golpe rebelde fíxose falanxista e colaborou coa Garda civil nas labores de “limpeza, pacificación e control”.

Xefe local de Falanxe Española Tradicionalista e das Xuntas de Ofensiva Nacional Sindicalista (FET-XONS) en 1937. Xefe local do Movimiento en Cambre, destituírono en outubro de 1944; tamén foi xuíz de paz na mesma localidade.

Moi significado na represión franquista en Cambre.

O día 18/04/1946 finou axustizado polo Grupo volante A Mariña de Manuel-Luis Bello Parga, Manolito Bello, Luis Seijo Freire; Francisco Rey Balbís, Moncho, e Marcelino Rodríguez Fernández, Marrofer, acusado de ser un dos que paseaban na xente.

Nesta acción tamén participaron Amador Domínguez Pan, Jaime Pimentel; Antonio Seoane Sánchez, Julián, Jorge; José Pedreira de la Iglesia, Queimarán, Tomás Padilla, Caravana; José-María Díaz Pan, Jaime; José Doldán Don, Daniel, e Manuel Díaz Pan, Rogelio. Morto de catro tiros, que lle pegou Moncho, cando Doval tratou de fuxir.

Por mor do seu axustizamento abriuse a causa 205/46.

Paseados en Cambre: Luciano Costa García, 29 anos, concelleiro de Cambre, o día 16/08/1936; Francisco Pérez Matos, 43 anos, de Cambre, o día 16/08/1936; José Pérez Ferreño, 26 anos, concelleiro de Cambre, o día 18/08/1936; Ricardo Penas Martínez, 47 anos, de Cambre, o día 20/08/1936; José-María Longueira, de Cambre, o día 19/09/1936; Félix Martínez, de Cambre, o día 19/09/1936.