Lodeiro Otero, Primitiva

Modista e política, 23 anos. Veciña da Coruña. Irmá de Manuel Lodeiro Otero.

Militante da CNT.

Encarcerada. Sancionada.

Moza do anarquista Antonio Torres López. Na súa casa das Xubias tivo agochado a Antonio e ao pai deste desde xullo de 1936 ata agosto de 1937, cando os detiveron aos dous na investigación pola tentativa de fuxida do vapor boniteiro Explorador, na que tamén se comprometera o seu irmán Manuel Lodeiro Otero.

O pesqueiro Explorador saíu para a marea desde o porto da Coruña o día 11/07/1937 e á tripulación prendérona en Vigo o día 09/08/1937, cando descargaban a pesca da marea e baixo a acusación de tentativa de fuxida á zona republicana. A organización deste intento correu a cargo de persoas vencelladas a El Despertar Marítimo, da CNT.

Os detidos en Vigo foron: Juan Arufe Romero, mariñeiro; Juan Bayolo Deus, mariñeiro, CNT; Andrés Bilbao García, albanel, SRI; Ramón Castro Rodríguez, fogueiro, CNT; José Feito García, barbeiro, PCE; Manuel Lodeiro Otero, mariñeiro, CNT; Manuel Malvido Martínez, mariñeiro; Aquilino Parapar Franco, mariñeiro, CNT; Alejandro Paz González, mariñeiro, CNT; Raimundo Santiago Pereira, mariñeiro; Victoriano Santos Campelo, mariñeiro, CNT e organizador; Domingo Serrano Insua, mariñeiro, CNT e organizador; Juan Serrano Insua, mariñeiro, CNT e organizador.

Tamén prenderon na Coruña, implicados como organizadores ou enlaces desta fuxida, a: José Gómez Roibal, fogueiro, CNT; Primitiva Lodeiro Otero, modista, CNT; José Longueira Bermúdez, pintor, CNT; Laura Lorenzo García, leiteira, PCE; Teresa Novelle Rodríguez, traballo na casa, PCE; Manuel Rodellino Carballo, zapateiro, CNT e Antonio Torres López, CNT.

Xulgada en consello de guerra na Coruña polo delito de rebelión en consello de guerra que tivo lugar os días 12 e 13/11/1937, na causa 1091/37, co resultado de sentenza a 12 anos e un día de prisión.

Neste xuízo condenaron á pena de morte a: José Feito García, José Gómez Roibal, José Longueira Bermúdez, Aquilino Parapar Franco, Alejandro Paz González, Manuel Rodellino Carballo e Juan Serrano Insua; penas de 20 anos de cadea para: Teresa Novelle Rodríguez e Victoriano Santos Campelo; 15 anos de cadea para Ramón Castro Rodríguez; castigaron a 12 anos a: Primitiva Lodeiro Otero e Antonio Naya Mariñas; pena de tres anos de prisión para Manuel Lodeiro Otero; ditaron auto de absolución para: Juan Arufe Romero, Juan Bayolo Deus, Raimundo Santiago Pereira e Domingo Serrano Insua; tamén procesaron a: Manuel Gantes Barreiro e Manuel Malvido Martínez.

Pena ordinaria conmutada pola comisión de exame de penas da Coruña.

En xuño de 1941 multárona con 75 pesetas por altercado cos axentes da autoridade e por malos antecedentes.

Segundo a Wikipedia finou en Vigo, onde a soterraron no cemiterio de Pereiró. Outras fontes sinalan que morreu nas Xubias.