López Centeno, Oliva

Tiña 9 anos. Solteira. Veciña de Montecelo. Irmá de José-Maximiliano López Centeno, fusilado, e de María-Luisa López Centeno, tamén encarcerada. Filla de Ramón López Casanova e sobriña de María López Casanova, asasinados. Á súa nai, Petra Centeno Baños, condenárona á cadea.

Encarcerada.

Cuñada de Carmen Rodríguez Nogueira, viúva do seu irmán José-Maximiliano. Carmen foi quen de converter a familia do seu home en enlaces e casa de apoio da guerrilla antifranquista desde setembro do ano 1947.

Procesada polo enfrontamento de Repil e O Piricallo, en San Xoán de Chavaga, Monforte de Lemos (Lugo) o día 20/04/1949, no que interviñeron 150 gardas civís de Ponferrada (León) e de Monforte de Lemos (Lugo) contra varios guerrilleiros.

Guillermo Morán García, Asturiano; Julián Acebo Alberca, Guardiña, e Gregorio Colmenero Fernández, o Porreto de Torbeo, morreron cando tentaban romper o cerco das forzas represivas. Tamén finou, probablemente por suicidio, Evaristo González Pérez, Rocesvinto. A Ramón López Casanova e a María López Casanova; estes dous últimos que eran irmáns, enlaces e donos da casa, executáronos en represalia. Fermín Gutiérrez Lada, Segura, ferido, sería quen de fuxir con Samuel Mayo Méndez. A María-Luisa López Centeno, compañeira de Rocesvinto, ferírona e prendérona.

A redada contou coa colaboración dun infiltrado da Garda Civil na guerrilla, Jesús Costoya López, Senén, que daría o aviso da presenza de fuxidos na zona de Chavaga.

Xulgada no Tribunal Militar Territorial de Lugo polo delito de “auxilio a malhechores”, na causa 318/49, co resultado de sentenza a dous anos de prisión segundo resolución do día 15/08/1949.

Internárona en Lugo e na Prisión Provincial de Mulleres de Madrid, onde coincide coas súa nai, a súa irmá e a súa cuñada.