Quiroga Daviña, Rafael

Funcionario, sindicalista e político, 50 anos. Casou con Josefa Palomil Montoto. Veciños de San Clodio de Ribas de Sil, Ribas de Sil (Lugo). No ano 1928 era secretario xudicial de Peñamellera Alta (Principado de Asturias); tempo despois, destinárono a Ribas de Sil.

Pertenceu á UXT, foi dirixente da Agrupación Socialista (AS) de Ribas de Sil e, no ano 1933, presidía a Sociedade Cultural Recreativa Artesá da súa localidade.

Fuxido. Encarcerado.

Prendérono os franquistas o día 01/10/1936 e, ese mesmo día, internárono na Prisión Provincial de Lugo. Hospitalizárono no Hospital Provincial de Lugo, de onde consegue fuxir.

Xulgado en consello de guerra no edificio da Deputación Provincial de Lugo o día 12/04/1937 polo delito de rebelión militar, na causa 636/36, co resultado de ser declarado fuxido e en rebeldía. Os procesados eran veciños, case que todos, de Ribas de Sil, Quiroga e O Saviñao.

Ao remate a 12 persoas condenáronas á pena de morte: Manuel Álvarez Martínez, xornaleiro; Bienvenido Bao Fernández, labrego; José Darriba Puente, labrego; Manuel Díaz López, labrego; Dionisio García Fraga, panadeiro; Bautista Martínez Fernández, xornaleiro; Enrique Martínez Franco, labrego; Albino Núñez Rodríguez, labrego; Rogelio Padín París, empregado; Nemesio Prieto Ferreiro, xornaleiro, e Toribio Rodríguez Torres, labrego. O que facía o número 12 conseguiu fuxir.

Castigaron a cadea perpetua a: Julio Cao López, Aurelio Colmenero López, Manuel Coutado Vázquez, Francisco Díaz López, José Domínguez Incógnito, Manuel Estévez Sánchez, Benito Fernández Blanco, Juan Pérez Rodríguez e Manuel Pérez Rodríguez.

Condenaron a 20 anos de cadea a: Albino Cao López, Clemente Fernández Rodríguez, Miguel Morillo Estévez, José-María Núñez Arias, Ramón Núñez Macía e Jaime Zamuz Rivero.

A José-María González Armesto sancionárono a 15 anos de prisión e, a 12 anos, a: Manuel Colina Anca, Severo Morillo Vidal, Julio Rodríguez Vázquez e Juan Zamuz Rodríguez. Tamén enviaron á cadea a José González González.

Sentenzas de sobresemento para: Luis Novoa Somoza, Pedro Ojea Montenegro e Donato Pol Bao (finado antes de ditarse a sentenza).

Auto de absolución para: Germán Cao López, Manuel Carballedo Núñez, José-Ramón Domínguez Castro, Manuel González Ojea e José Morillo Olmo.

Declararon fuxidos e en rebeldía a: Aurelio Caamaño Rodríguez, Marcelino Fernández Prada e Rafael Quiroga Daviña.

Capturárono, retomaron o anterior proceso e condenárono á pena de morte segundo resolución do día 27/04/1937.

Pena de morte conmutada na comisión de exame de penas de Lugo pola de cadea perpetua.

Xulgado en consello de guerra en Lugo polo delito de auxilio á rebelión, na causa 484/37, co resultado de sentenza de sobresemento provisorio segundo resolución do día 02/06/1937.

Abríronlle un expediente de responsabilidades políticas en setembro de 1937.

Xulgado no Tribunal Militar Territorial de Lugo pola fuga da prisión na causa 185/40.

Despois de permanecer fuxido, entrégase ás autoridades no ano 1940.

Interno na Prisión Provincial de Lugo, publicaron a súa liberdade condicional provisoria no BOE nº 362 do día 28/12/1943.