Ojea Torrecilla, Manuel

Mecánico, 22 anos. Casou con María-Teresa Sobradelo Fernández; tiveron catro fillos: Manuel, Antonio, José e Carlos. Veciños de Cabo de Cruz, Santa María de Castro, Boiro.

Membro da directiva da UXT en Cabo de Cruz.

Fuxido. Encarcerado.

Foxe na evasión da lancha a motor San José nº 2, desde Cabo de Cruz, Boiro, ao porto de Leixões, Matosinhos (Portugal) o día 27/07/1936, fuga que organizara o alcalde en funcións de Boiro, José Martínez Virel. Os 19 fuxidos desembarcaron no porto de Leixões, prendéronos e recluíronos no Forte de São Bruno de Caxías, Oeiras (Portugal).

Nesta operación fuxiron os seguintes veciños de Boiro: Cipriano-Juan-Emilio Blanco Fuciños, funcionario municipal; Marcial de Diego Andreu, funcionario municipal; Antonio Ferreirós Martínez, mariñeiro; Antonio Lago Outeiral, carpinteiro; José Martínez Virel, mestre; José-Manuel Muñiz Santiago, mariñeiro; Manuel Ojea Torrecilla, mecánico; Juan-Antonio Somoza Outeiral, ferreiro; Ramón Somoza Rebollido, ferreiro; Victoriano Somoza Rebollido, ferreiro e José Viturro Ozores, mariñeiro.

Tamén escaparon os veciños da Pobra do Caramiñal: Antonio Domínguez Fontán, funcionario municipal; Carlos-Segundo Iglesias Rodríguez, mecánico; Pastor Núñez Cariño, funcionario municipal; Antonio Pérez Gómez, mecánico e Manuel-Venerando Porteiro Viña, funcionario municipal.

De Vilagarcía de Arousa (Pontevedra) fuxiron: Pedro Díaz Abalo, comerciante; José-Manuel-Bernardino Rodríguez Alarcón, médico e Elpidio Villaverde Rey, industrial, deputado nacional por ER.

Era o motorista do barco. Co tempo pasou á zona republicana de Tarragona.

Xulgado en consello de guerra en Ferrol (A Coruña), na causa 4267/38, co resultado de ser declarado fuxido e en rebeldía.

Prendérono os franquistas e condenárono en 1941 a cadea perpetua.

Pena ordinaria conmutada pola de 12 anos e un día no mesmo ano 1941.

Interno na Prisión Provincial de Lugo, puxérono en liberdade condicional provisoria o día 01/03/1943, que se publicou no BOE nº 76 do día 17/03/1943.