Losada Yáñez, José

Tiña 22 anos. Casado con Alida González Arias, a Penca, á que imbuíu na política; tiveron polo menos un fillo: Esteban, e dúas fillas.

Militante da UXT.

Fuxido. Morte en enfrontamento.

Agochado desde o momento de producirse o golpe militar para evitar que o pasearan como xa ocorrera con outros compañeiros. Alida agochouno e era quen lle facilitaba comida, roupa e cartuchos, pois José era un bo cazador. Á súa dona prendérona cando lle levaba alimentos e municións; desterrárona co seu fillo Esteban a Cantalapiedra (Salamanca).

Un grupo notable na Serra do Eixo era o que dirixía Manuel Álvarez Arias, Bailarín, e os seus amigos Alfredo Yáñez Domínguez, o Aguirre; Domingo Rodríguez López, o Xirolo, Inca; José Vega Seoane, o Ánimas, José Losada Yáñez e outros.

Ao remate de 1937 uníronselles os que procedían do Principado de Asturias, como Manuel Girón Bazán, Girón; Marcelino de la Parra Casas, Parra; Abelardo Macías Fernández, o Lebre; Silverio Yebra Granja, o Atravesado; Eduardo Pérez Vega, o Tameirón; Abel Ares Pérez; Enrique Oviedo Blanco, Chapa, e varios máis. Contrario a chegada dos asturianos e aos seus intentos de control das partidas, Manuel Álvarez Arias entregouse á Garda Civil e fusilárono por non informar sobre os seus camaradas.

José morreu a mans dunha patrulla da Garda Civil e de falanxistas, cando se atopaba agochado nunha cova. Alida soubo da súa morte cando se atopaba no desterro en Cantalapiedra.

Máis tarde Alida sería compañeira de Manuel Girón Bazán, Girón, que era veciño dela e amigo de José.

Procesárono por responsabilidades políticas en Valladolid.