Nieto López, Julio

Radiotelegrafista, 29 anos. Casado con Loreto Tapia.

Executado.

Antigo garda de asalto, fora alférez en outubro de 1936 e, despois, capitán durante a Guerra Civil Española na zona republicana por méritos de guerra.

Ao remate da contenda española prendérono os golpistas.

Xulgado en consello de guerra sumarísimo en Madrid e condenado á cadea.

Interno na Prisión Central de Yeserías (Madrid), publicaron a súa liberdade condiciona provisoria no BOE nº 281 do día 08/10/1943.

A finais de 1944 destacárono como secretario xeral do Comité Provincial do PCE en Lugo, do que tamén formaban parte Emilio Golás Rodríguez, o Villa, e a mestra Enriqueta Otero Blanco, María dos Dores; tamén estaban Gaspar-Antonio Castro López, como secretario de axitación e propaganda e Pepe Pin como secretario de organización e finanzas.

Mantivo contactos co guerrilleiro antifranquista José-Luis Castro Veiga, o Piloto.

Foxe dunha redada en 1945 e agochouse en Láncara (Lugo) .

Detivérono o día 14 de febreiro de 1946, por mor dunha filtración á policía fascista, nunha emboscada en Lugo na que tamén prenderon, entre outras persoas, a Novolitos e a Enriqueta Otero.

Xulgado en consello de guerra na Coruña o día 18/07/1946 polo delito de rebelión militar, na causa 75/46, co resultado de sentenza á pena de morte.

Neste xuízo condenaron á pena de morte a: Enriqueta Otero Blanco, José-María Urquiola Iglesias e Ramón Vivero Geada. Tamén procesaron, entre outras moitas persoas, a: César Alonso Álvarez, Francisco Alvaredo Rodríguez, Guillermo Arenas Casal, Gaspar-Antonio Castro López, Genaro Fernández Ares, Gerardo López Chas, Julio Nieto López, Manuel Rábade Rodríguez, Antonio Rodríguez González, Maximino Rodríguez Pérez e José Santiago Temprano.

Executado na Prisión Provincial da Coruña, no garrote vil, o día 21 de setembro na compañía do tamén militante do PCE Ramón Vivero Geada, Novolitos.

Soterrárono o día 21 de setembro na sepultura anónima número 74 da parte civil do cemiterio de San Amaro, na Coruña.