López Losada, Armando

Carpinteiro e político, 26 anos. Solteiro. Veciño de Escairón, San Salvador de Vilasante, O Saviñao.

Membro da Agrupación Socialista (AS) de Escairón. Militante da UXT na Sociedad de Trabajadores de la Tierra da súa localidade.

Fuxido. Encarcerado.

No desenvolvemento da guerra civil desertou do exército sublevado e fuxiu.

Xulgado en consello de guerra en Lugo polo delito de rebelión militar e auxilio á rebelión, na causa 415/38, co resultado de ser declarado fuxido e en rebeldía. Xulgaron neste procedemento a varios veciños do Saviñao. Xuízo no que se acumularon outras causas.

Condenaron á pena de morte a: Antonio López Barro, Antonio Sánchez Quiroga e José-María Teixeira Montero; cadea perpetua para: Jesús Nieves Sánchez, Manuel Pérez Fernández, Bernardo Sánchez Quiroga e Francisco Sánchez Quiroga; prisión de 12 anos a: José Ferreiro Pérez, Germán López González, José Losada Ferreiro e Luis Rodríguez Losada. Ditouse auto de sobresemento para: Jesús Díaz Rodríguez, Adelino Losada Rodríguez, Moisés Quiroga Sarmiento, Emilio Ramos Barro e Evaristo Rodríguez Méndez. Declararon fuxidos a: Armando López Losada, Antonio Losada Ferreiro, Antonio Nieves Ferreiro e Ramón Pérez Bispo.

Entregouse ás autoridades franquistas en marzo de 1940 con Ramón Pérez Bispo e Antonio Losada Ferreiro e ingresárono na Prisión Provincial de Lugo o día 11/03/1940.

Xulgado en consello de guerra en Lugo polo delito de auxilio á rebelión, na causa 32/41, co resultado de sentenza a 12 anos de prisión. Xuízo contra varios veciños do Saviñao.

Neste proceso condenaron a 12 anos de cadea a: Armando López Losada, Antonio Losada Ferreiro e Ramón Pérez Bispo. Tamén enxuizaron a Luis Rodríguez Losada.

Concédeselle a prisión atenuada o día 10/10/1941.

Interno na Prisión Provincial de Lugo, publicaron a súa liberdade condicional provisoria no BOE nº 300 do día 27/10/1941.

Procesárono en Lugo por responsabilidades políticas e indultárono no ano 1942.