Barcia Ferreiro, Juan

Obreiro naval e labrego, 34 anos. Casado con Remedios. Veciños do Vilar, San Xiao de Narón. Peón armador da Sociedad Española de Construcción Naval (SECN) de Ferrol (A Coruña).

Militante da UXT de Narón.

Fuxido. Encarcerado.

Formou parte do Grupo Neira, que dirixía José Neira Fernández, o Neira, grupo que se formou no verán de 1936 e no que se integraban varios republicanos que fuxiran ao monte para escapar da represión dos sublevados.

Na partida de José Neira estiveron: Juan Barcia Ferreiro, o Rato; Eugenio Bernal Pérez; Evaristo Candelas Pérez, o Evaristo, Ángel Franco; Amando Carro Pérez; Gregorio Dopico Fernández, Bolichero, Yoyo; Ceferino Fernández Formoso e o seu irmán José Fernández Formoso; José-Antonio Franco Basanta, o Caudillo, o Manchego; os irmáns Alberto Franco Lamela, Manuel Franco Lamela, Remigio Franco Lamela e Teodoro Franco Lamela; Francisco Gómez Núñez, Trotski, Penabad; Leonardo Gómez Pérez, Trancas; Eusebio González Pedreira, Juan, Juanito Amá; Jesús-María Iglesias Escourido, Franco, o Tizón, Caudillo; Jesús Iglesias Vázquez, o Muros, o Pichel; Vicente Lage Fernández, o Chicharro; Jesús Lavandeira Pérez, Ladrillo, Dapena; Antonio Molíns Valls, o Noi, o Catalán; Amandino Neira Fernández; José Neira Fernández, o Neira; Antonio Paleo Saavedra; Demófilo Pedreira Rumbo, Nene; Francisco Pintado Pérez; Plácido Rivera Cociña, Plácido; Marcelino Rodríguez Fernández, Marrofer, Valentín, Asturiano, Chispas, e Modesto Vilar Insua, Modesto da Americana.

Xulgado en consello de guerra en Ferrol polo delito de rebelión militar, na causa 220/37, co resultado de sentenza a cadea perpetua segundo resolución do 29/03/1937.

No mesmo xuízo recibiu a mesma condena Antonio Díaz Incógnito.

Internárono no Castelo de San Felipe, en Ferrol.

Ingresado no penal do Forte de San Cristóbal, Pamplona (Navarra) o día 04/07/1937. Participou no intento de fuga masiva do día 22/05/1938, capturárono o seguinte día 23 no monte Ezkaba.

Puxérono en liberdade o día 21/02/1941 por conmutación da pena na comisión de exame de penas da Coruña. Pasou tres anos e dous meses na cadea.