Dopico Fernández, Gregorio

Tiña 17 anos. Traballou nunha fábrica de gasosas.

Militante da CNT e da Federación Anarquista Ibérica (FAI).

Fuxido. Morte en enfrontamento.

Prendérono axentes da Brigada Social na Coruña o día 16/09/1942.

Enlace da guerrilla, foxe diante da caída da organización do PCE na bisbarra de Ferrol (A Coruña) en febreiro de 1945. Cando caeu a organización libertaria de Ferrol uniuse ao grupo de Juan Pérez Dopico, Xan de Xenaro, quen morrería nun enfrontamento tamén.

Formou parte do Grupo Neira, que dirixía José Neira Fernández, o Neira, grupo que se formou no verán de 1936 e no que se integraban varios republicanos que fuxiran ao monte para escapar da represión dos sublevados.

Na partida de José Neira estiveron: Juan Barcia Ferreiro, o Rato; Eugenio Bernal Pérez; Evaristo Candelas Pérez, o Evaristo, Ángel Franco; Amando Carro Pérez; Gregorio Dopico Fernández, Bolichero, Yoyo; Ceferino Fernández Formoso e o seu irmán José Fernández Formoso; José-Antonio Franco Basanta, o Caudillo, o Manchego; os irmáns Alberto Franco Lamela, Manuel Franco Lamela, Remigio Franco Lamela e Teodoro Franco Lamela; Francisco Gómez Núñez, Trotski, Penabad; Leonardo Gómez Pérez, Trancas; Eusebio González Pedreira, Juan, Juanito Amá; Jesús-María Iglesias Escourido, Franco, o Tizón, Caudillo; Jesús Iglesias Vázquez, o Muros, o Pichel; Vicente Lage Fernández, o Chicharro; Jesús Lavandeira Pérez, Ladrillo, Dapena; Antonio Molíns Valls, o Noi, o Catalán; Amandino Neira Fernández; José Neira Fernández, o Neira; Antonio Paleo Saavedra; Demófilo Pedreira Rumbo, Nene; Francisco Pintado Pérez; Plácido Rivera Cociña, Plácido; Marcelino Rodríguez Fernández, Marrofer, Valentín, Asturiano, Chispas, e Modesto Vilar Insua, Modesto da Americana.

Morto o Neira, integrouse na IV Agrupación do Exército Guerrilleiro de Galicia (EGG) e foi comandante do Destacamento Segundo Vilaboy, que tiña como comisario político ao comunista Adolfo-Cipriano Allegue Allegue, Riqueche, e responsable en Lugo a Gregorio Doñate Martínez.

Por este destacamento pasaron, entre outras persoas: Adolfo-Cipriano Allegue Allegue, Riqueche; Gregorio Doñate Martínez; Gregorio Dopico Fernández, Bolichero, Yoyo; Juan Gallego Abeledo, Juan dos Buzos, Comandante; José Pedreira de la Iglesia, Queimarán, Tomás Padilla, Caravana, e Juan Pérez Dopico, Xan de Xenaro.

Procesárono diante do Tribunal Militar Territorial de Ferrol (A Coruña) na causa 351/46 e na causa 515/46 por atraco a man armada (declarárono fuxido nos dous casos).

Tamén o xulgaron en consello de guerra en Ferrol polo delito de agresión ás forzas armadas, na causa 377/47.

Neste expediente procesaron a Gregorio Dopico Fernández e a Nicolás Rodríguez Pereira; para este último ditaron sentenza de sobresemento por morte anterior.

Morto por disparos da Garda Civil, o día 30/07/1947, nunha canteira do monte Reboredo, que bordea a estrada a Lavandeira, xunto con Nicolás Rodríguez Pereira, Colás, logo dunha denuncia. Aniquilados nun enfrontamento con forzas represivas moi superiores en número. Feriron ao número da Garda Civil Félix Portugal.