Pérez Mayobre, Basilio

Político. Veciño de Cervás. Irmán de José-María Pérez Mayobre, procesado. Administrativo no Concello de Ares.

Militante do PSOE de Cervás. Concelleiro polo PSOE nas corporacións de Ares de 1931 e 1932. Concelleiro en Ares cando o golpe de Estado do 1936.

Tiña como compañeiros na Corporación de Ares de 1936, entre outras persoas, a: José López Lourido, quen fora alcalde de Ares e a quen asasinaran os sublevados; Benito Feijoo Seguín e José Sequeiro Ares fuxiron cara o exilio.

Fuxido. Exiliado.

Durante a guerra civil escondeuse na casa da súa irmá, na Pedreira, San Vicente de Meá, Mugardos (A Coruña), e no Seixo. O seu irmán José-María Pérez Mayobre, que estaba na Armada, achegou un uniforme para que os fuxidos se desprazaran sen levantar sospeitas.

O día 21/07/1939 a unha da mañá foxe no bou Ramón cara Inglaterra, aínda que acabaron en La Pallice (Francia), onde chegaron os 27 fuxidos o día 23 de xullo; conducíronos ao campo de concentración de Le Barcarès (Pireneos Orientais, Occitania, Francia). A fuga organizárana os irmáns Miguel Leira Fernández e Antonio Leira Fernández, os Chuchos da Vella. O seu irmán José-María axudounos para que os fuxidos non levantaran sospeitas.

No bou Ramón fuxiron 27 persoas: Luis Abella Beade; Manuel Barreiro Montero; Cipriano-Antonio Casteleiro Feal, militar; Juan Castro Villar, xornaleiro; Benito Feijoo Seguín, canteiro; Manuel Fernández García; Juan Fraga Rey; José Fuentes Justo; Manuel Fuentes Justo; Manuel Gómez Varela, xornaleiro; Moisés Lago Lorenzo, sindicalista; Marcelino Lara Viñas, mariñeiro; Rogelio Leal López, sindicalista; Juan Leal Tenreiro; Antonio Leira Fernández (organizador); Miguel Leira Fernández, (organizador); José Montero Fernández; Jesús Morgade Feal, militar; Basilio Pérez Mayobre, político; Manuel Raposo Peña, militar; José Rebón Martínez, metalúrxico; Juan Rincón Téllez, peón; Juan-José Rodríguez Díaz; Antonio Saavedra Montero, xornaleiro; Antonio Santamaría López, metalúrxico (alcalde de Ferrol); José Sequeiro Ares e Domingo Serantes Sequeiro, obreiro naval.

A tripulación do barco asaltado formábana: José-Antonio Sequeiro Fernández, patrón de costa; José-Ramón Sánchez Amado, maquinista, e os mariñeiros: José-Benito Brage Cartelle, Juan-Antonio Fernández López, Gabriel González Porto, José-María Martínez Martiño, Ramón Rey García, José-María Rodríguez Planas, Francisco Romualdo Martiño e Juan Sánchez Fernández.

Por mor desta fuga procesaron como persoas encubridoras, entre outras, a: Antonia Amado Varela, xornaleira; as irmás Carmen Landeira Maneiro, modista; Felicia Landeira Maneiro, traballo na casa, e Rosa Landeira Maneiro, traballo na casa, e tamén María Pazos Vázquez, traballo na casa; José-María Pérez Mayobre, militar, e Dolores Seijas Montero, xornaleira.

Xulgado en consello de guerra en Ferrol (A Coruña) polo delito de rebelión militar (fuxida do bou Ramón), na causa 2134/39, co resultado de ser declarado fuxido e en rebeldía.

En 1945, co alcalde Benito Feijoo, publicaron en Francia un anuncio tratando de localizar a outros fuxidos.

Casou en Francia, por poderes, con Celia Rebón Martínez, irmá de José Rebón Martínez, Gelfo, compañeiro da fuxida.