Lago Lorenzo, Moisés

Sindicalista e político, 36 anos. Veciño de Ferrol (A Coruña).

Militante anarquista. Na ditadura de Miguel Primo de Rivera Orbaneja foi un dos organizadores da CNT en Ferrol. En 1927 era membro da Sociedade de Cociñeiros La Paz, de Ferrol, da que sería presidente en 1930. En 1931 era tesoureiro do Comité Rexional e delegado de varios sindicatos no congreso rexional.

Detivérono logo da folga xeral de maio de 1933.

Fuxido. Exiliado. Encarcerado.

Co golpe dos sublevados fuxiu e permaneceu agochado ata lograr pasar a Francia.

O día 23/05/1937 mantivo con Luis Abella Beade un enfrontamento coa forza pública na casa de Xuvia, Narón (A Coruña), onde se acubillaban. Con posterioridade os represores detiveron á dona da casa e condenárona á pena de morte.

O día 21 de xullo de 1939 conseguiu embarcar en Ares (A Coruña), con outros 26 republicanos, na evasión do bou Ramón, conseguiron chegar a Francia. Confinado no campo de refuxiados de Argelès-sur-Mer (Pireneos Orientais, Occitania, Francia) de onde saíu o día 04/12/1939 para incorporarse á 127ª Compañía de Traballadores Españois.

No bou Ramón fuxiron 27 persoas: Luis Abella Beade; Manuel Barreiro Montero; Cipriano-Antonio Casteleiro Feal, militar; Juan Castro Villar, xornaleiro; Benito Feijoo Seguín, canteiro; Manuel Fernández García; Juan Fraga Rey; José Fuentes Justo; Manuel Fuentes Justo; Manuel Gómez Varela, xornaleiro; Moisés Lago Lorenzo, sindicalista; Marcelino Lara Viñas, mariñeiro; Rogelio Leal López, sindicalista; Juan Leal Tenreiro; Antonio Leira Fernández (organizador); Miguel Leira Fernández (organizador); José Montero Fernández; Jesús Morgade Feal, militar; Basilio Pérez Mayobre, político; Manuel Raposo Peña, militar; José Rebón Martínez, metalúrxico; Juan Rincón Téllez, peón; Juan-José Rodríguez Díaz; Antonio Saavedra Montero, xornaleiro; Antonio Santamaría López, metalúrxico (alcalde de Ferrol); José Sequeiro Ares e Domingo Serantes Sequeiro, obreiro naval.

A tripulación do barco asaltado formábana: José-Antonio Sequeiro Fernández, patrón de costa; José-Ramón Sánchez Amado, maquinista, e os mariñeiros: José-Benito Brage Cartelle, Juan-Antonio Fernández López, Gabriel González Porto, José-María Martínez Martiño, Ramón Rey García, José-María Rodríguez Planas, Francisco Romualdo Martiño e Juan Sánchez Fernández.

Por mor desta fuga procesaron como persoas encubridoras, entre outras, a: Antonia Amado Varela, xornaleira; as irmás Carmen Landeira Maneiro, modista; Felicia Landeira Maneiro, traballo na casa, e Rosa Landeira Maneiro, traballo na casa, e tamén María Pazos Vázquez, traballo na casa; José-María Pérez Mayobre, militar, e Dolores Seijas Montero, xornaleira.

Uniuse á Unión Nacional Española (UNE) e loitou contra dos nazis no país galo.

Xulgado en distintas causas en Ferrol polo delito de rebelión co resultado de ser declarado fuxido e en rebeldía.

En 1944 participou nas operacións da Invasión do Val de Arán (Lleida).