Serantes Sequeiro, Domingo

Obreiro e político, 40 anos. Casado con Francisca Porta Santamarina, procesada en causa militar e posta en liberdade. Veciños de San Salvador de Serantes, Ferrol. Obreiro naval, modelista da Sociedad Española de Construcción Naval (SECN) en Ferrol.

Membro da UXT e militante da Agrupación Socialista (AS) de Serantes. Concelleiro de Serantes na II República, na corporación de 1931 polo Partido Republicano Radical (PRR) e na de 1932 polo PSOE.

Pola súa participación na folga xeral revolucionaria de outubro de 1934 encarcerárono na prisión da Escollera do Arsenal de Ferrol e cesárono en novembro como concelleiro. En consello de guerra do 12 de febreiro de 1936, na causa 310/34, condenárono a seis anos de prisión menor, saíndo en liberdade pola amnistía, poucos días despois, da Fronte Popular (FP).

Fuxido. Exiliado. Encarcerado.

O día 21/07/1939 a unha da mañá foxe no bou Ramón cara Inglaterra, aínda que acabaron en La Pallice (Francia), onde chegaron os 27 fuxidos o día 23 de xullo; conducíronos ao campo de concentración de Le Barcarès (Pireneos Orientais, Occitania, Francia). A fuga organizárana os irmáns Miguel Leira Fernández e Antonio Leira Fernández, os Chuchos da Vella.

No bou Ramón fuxiron 27 persoas: Luis Abella Beade; Manuel Barreiro Montero; Cipriano-Antonio Casteleiro Feal, militar; Juan Castro Villar, xornaleiro; Benito Feijoo Seguín, canteiro; Manuel Fernández García; Juan Fraga Rey; José Fuentes Justo; Manuel Fuentes Justo; Manuel Gómez Varela, xornaleiro; Moisés Lago Lorenzo, sindicalista; Marcelino Lara Viñas, mariñeiro; Rogelio Leal López, sindicalista; Juan Leal Tenreiro; Antonio Leira Fernández (organizador); Miguel Leira Fernández, (organizador); José Montero Fernández; Jesús Morgade Feal, militar; Basilio Pérez Mayobre, político; Manuel Raposo Peña, militar; José Rebón Martínez, metalúrxico; Juan Rincón Téllez, peón; Juan-José Rodríguez Díaz; Antonio Saavedra Montero, xornaleiro; Antonio Santamaría López, metalúrxico (alcalde de Ferrol); José Sequeiro Ares e Domingo Serantes Sequeiro, obreiro naval.

A tripulación do barco asaltado formábana: José-Antonio Sequeiro Fernández, patrón de costa; José-Ramón Sánchez Amado, maquinista, e os mariñeiros: José-Benito Brage Cartelle, Juan-Antonio Fernández López, Gabriel González Porto, José-María Martínez Martiño, Ramón Rey García, José-María Rodríguez Planas, Francisco Romualdo Martiño e Juan Sánchez Fernández.

Por mor desta fuga procesaron como persoas encubridoras, entre outras, a: Antonia Amado Varela, xornaleira; as irmás Carmen Landeira Maneiro, modista; Felicia Landeira Maneiro, traballo na casa, e Rosa Landeira Maneiro, traballo na casa, e tamén María Pazos Vázquez, traballo na casa; José-María Pérez Mayobre, militar, e Dolores Seijas Montero, xornaleira.

Causa aberta en Ferrol polo delito de rebelión militar (fuxida do bou Ramón) co resultado de ser declarado fuxido e en rebeldía.

Residiu en Alemaña de onde o extraditaron no ano 1945.

Xulgado en consello de guerra en Ferrol polo delito de rebelión militar co resultado de sentenza a 12 anos e un día de reclisión.

Indultárono no ano 1946.