Fernández Crespo, Antonio

Ferreiro, 18 anos. Veciño de Cervantes (Lugo).

De tendencia socialista pero sen afiliación.

Fuxido. Exiliado?.

Incorporado ao monte desde 1936, sufrindo o seu grupo fortes persecucións policiais e militares.

Xulgado en Lugo por atraco e roubo a man armada, na causa 838/39, co resultado de ser declarado fuxido e en rebeldía segundo resolución do día 22/04/1940.

Membro do grupo de David Fuentes Álvarez, Velasco, que actuaban nos montes de Valboa e O Cebreiro. Participou no Congreso de Ferradillo, en Priaranza del Bierzo, preto de Ponferrada, nos Montes Aquilianos (León) do día 24/04/1942, no que se reuniron 24 guerrilleiros de todas as tendencias políticas, asturianos, leoneses e galegos e que deu lugar á creación da Federación de Guerrillas de León-Galicia (FG).

Elixiuse un Estado Maior dirixido por Marcelino Fernández Villanueva e no que tamén figuraban César Ríos Rodríguez, Mario Morán García, Abel Ares Pérez, Marcelino de la Parra Casas e Manuel Girón Bazán como lugartenentes. Había cinco socialistas, catro anarquistas da CNT, seis da UXT, catro comunistas e cinco sen adscrición política. A base de operacións era a Serra do Eixe, nos montes de Santa María de Casaio, Carballeda de Valdeorras (Ourense).

Os 24 asistentes a este congreso foron: Edelmiro Alonso García, Delmiro; Hilario Álvarez Méndez, Bienvenido; Abel Ares Pérez; Miguel Cuellas Gómez, Artillero; Antonio Fernández Crespo, Fuenteoliva; Marcelino Fernández Villanueva, Gafas; Manuel Girón Bazán, Girón; Manuel Gutiérrez Abella; Abelardo Gutiérrez Alba; Gerardo Lamas Cerezales; Pedro Lamas Cerezales, Pedrín; Abelardo Macías Fernández, o Lebre; Guillermo Morán García, Asturiano; Mario Morán García; Antolín Murias, Paciencia; Victorino Nieto Rodríguez, Cuñeira; Enrique Oviedo Blanco, Chapa; Marcelino de la Parra Casas, Parra; Amador Pérez Poncelas; Eduardo Pérez Vega, o Tameirón; César Ríos Rodríguez; Arcadio Ríos Rodríguez; José Vega Seoane, Ánimas, e Pedro Voces Canóniga, Pitaciega.

Xulgado no Tribunal Militar Territorial de Lugo polo delito de agresión ás forzas armadas, na causa 180/45, co resultado de ser declarado fuxido e en rebeldía.

Tamén o xulgaron en Lugo na causa 294/45 polo delito de atraco; tamén o declararon en rebeldía.

Desde 1945 foi, con Abelardo Gutiérrez Alba, vicecomandante da III Agrupación da FG, que comandaba Manuel Castro Tellado e que tivo que retirarse á área de actividades do sueste lugués. Axudante de Castro Tellado nesta III Agrupación, posto no que o cesou o Estado Maior da FG por “deficiencias en sus responsabilidades”.

Requirírono no Xulgado Eventual nº 1 de Lugo na causa 215/46.

Volveron xulgalo en Lugo por bandoleiro na causa 616/48.

Logrou pasar a Francia no ano 1948.

Bernardo Máiz sinala a súa suposta morte en enfrontamento armado nunha data indeterminada do ano 1946.