Nieto Rodríguez, Victorino

Tiña 25 anos. Compañeiro sentimental de Alpidia García Moral, Maruxa, coa que estivo no monte case que seis anos.

Militante anarcosindicalista da CNT.

Fuxido. Exiliado.

Combateu na fronte asturiana e cando cae esa fronte marchou, no ano 1937, para Santa María de Casaio, Carballeda de Valdeorras (Ourense), con Marcelino de la Parra Casas e Manuel Girón Bazán, entre outros.

Participou no Congreso de Ferradillo, en Priaranza del Bierzo, preto de Ponferrada, nos Montes Aquilianos (León) do día 24/04/1942, no que se reuniron 24 guerrilleiros de todas as tendencias políticas, asturianos, leoneses e galegos, e que deu lugar á creación da Federación de Guerrillas de León-Galicia (FG).

Elixiuse un Estado Maior dirixido por Marcelino Fernández Villanueva e no que tamén figuraban César Ríos Rodríguez, Mario Morán García, Abel Ares Pérez, Marcelino de la Parra Casas e Manuel Girón Bazán como lugartenentes. Había cinco socialistas, catro anarquistas da CNT, seis da UXT, catro comunistas e cinco sen adscrición política. A base de operacións era a Serra do Eixe, nos montes de Santa María de Casaio, Carballeda de Valdeorras (Ourense).

Os 24 asistentes a este congreso foron: Edelmiro Alonso García, Delmiro; Hilario Álvarez Méndez, Bienvenido; Abel Ares Pérez; Miguel Cuellas Gómez, Artillero; Antonio Fernández Crespo, Fuenteoliva; Marcelino Fernández Villanueva, Gafas; Manuel Girón Bazán, Girón; Manuel Gutiérrez Abella; Abelardo Gutiérrez Alba; Gerardo Lamas Cerezales; Pedro Lamas Cerezales, Pedrín; Abelardo Macías Fernández, Lebre; Guillermo Morán García, Asturiano; Mario Morán García; Antolín Murias, Paciencia; Victorino Nieto Rodríguez, Cuñeira; Enrique Oviedo Blanco, Chapa; Marcelino de la Parra Casas, Parra; Amador Pérez Poncelas; Eduardo Pérez Vega, o Tameirón; César Ríos Rodríguez; Arcadio Ríos Rodríguez; José Vega Seoane, Ánimas, e Pedro Voces Canóniga, Pitaciega.

No IV Congreso do FG, realizado entre o 10 e o 12 de outubro de 1944, nomeárono, con Abelardo Macías Fernández, o Lebre, responsable dunha das catro guerrillas da I Agrupación. O seu grupo, de oito homes, actuou no triángulo Ponferrada-Lugo-Ourense.

Xulgado no Tribunal Militar Territorial de Lugo na causa 616/48 acusado de bandoleiro.

En 1948 negouse a ingresar no Exército Guerrilleiro de Galicia (EGG) por que o dominaban os comunistas. Tamén se negou nese ano a marchar a Francia e a finais dese ano actuaba na fronteira entre as provincias de Lugo e León con outro cenetista, Abelardo Macías Fernández; o socialista Hilario Álvarez Méndez, Bienvenido, Oliveros Fernández Armada, Negrín, e Alpidia García Moral.

O día 17/03/1949 ao seu grupo sorprendérono en Villasinde, Vega de Valcarce (León). No enfrontamento coas forzas represoras morren a súa compañeira Alpidia García, Abelardo Macías e Hilario Álvarez. Victorino e Oliveros Fernández conseguen fuxir.

Máis tarde cruzou a fronteira francesa e de alí marchou a México.